بحلم بالمطر _ أشرف بخيت محمد يوسف

 **بحلم-بالمطر**

أنسج خيوط النور وشاح

أكسيك درر

ما أصلو درب الريدة بان

لما بدرك لي ظهر

وجمل الساحات قصيد

إتوشح السماء بالقمر

طليت على ريحة دعاش

وومضة حروف نسمة سحر

وأنا مهما أتجمل وأقول

ألقى حرفي عليك فتر

ودعت بيك أحزان أساي

هدهدتي خاطرا إتكسر

إمكن تقولي علي خيالي

وأنا أصلي في الآخر بشر

أسألي القلب البهاتي

اسألي الطل والشجر

انا تهت من قبلك كتير

صادقت أمواج البحر

وانا أصلي مفتون بيهن عيون

يوماتي بحلم بالمطر

شديت مراكبي على الضفاف

ذوبت أصداف النهر

إمكن ألاقي شبهي فيكم لو حن قلبك بي شعر

واللهفة بيك عشم الوصول

شوفة عيون نعمة بصر

نفرش حلمنا علي الضفاف

في لهفة يحلالنا السمر

تتشابك الأرواح دوام

في سكة ما بتعرف خطر

ونودع الضاع من عمير

نشدد صباعنا على الوتر.

كلماتي وأشعاري :""

اشرف بخيت محمد يوسف