متسألش
***
بتسأل ليه؟ متسألش
علي توتة وحدوتة
وقصه فيها مختلفين
كأنها دايرة مقفولة
تدور فيها علي حلقة
تكون دايبه عشان تخرج
تلاقي حاجه بتشدك
وبتقولك فايتني لمين
ومين غيرك هينصفني ويوصفني
يانن العين ؟
انا بنت حوا وانت عارف
بنت حوا تبقي مين
أنا الدلوعة والسنيورة والغندورة
وانا اللي بدوخك من نظرة
ومن لمسه يطير قلبك
ولو زودتها شوية
تدوب في ايديا يا مسكين
أما جنتي الزايفة ، بيسرقها ...
أبو عين زايغة
ناقص الأدب والدين
وانا الدلوعة والسنيورة والغندورة
والغالية اللي ما يروضها
غير فارس نبيل وامين
وصاينه جمالي مداريه
عفيفة ، طاهرة ونقيه
وصوتي بالكلام مايلين
ولو حابب ازيد في الوصف
انا الأم اللي بتحن
انا الأخت اللي من اهلك
انا البنت اللي من ضهرك
انا الزوجه اللي بوصالها تملي تضم
وتديلك حنان وحنين
تحب ازيد واقول تاني
أنا الدلوعة والسنيورة والغندورة
اللي منكده عيشتك
وبالتكشيرة تلقاني كده في وشك
هتهرب مني وتروح فين؟
ومين يسمعني لما اقول :
هات ، مفيش ، عايزين
اتصرف زي كل الناس
مهو احنا مسؤلين منك
أنا وعيالك الحلوين
وفيه حاجه متتقالش
هقولها عشان متسألش
مابين مسح وطبيخ وغسيل
وربطة راسي بالمنديل
بكون زي العسكري في كمين
ويجي الليل وانام جنبك
كأنك نار وانا البنزين
تجيني شمال الف يمين
واقولك سبني تعبانه
وواخده للصداع قرصين
كده قلت اللي عندي خلاص
ومستنيه أسمعها
بتسأل ليه وعايز مين ؟
***
أنا ياحبيبتي مسألتش
لكني بقولها من قلبي
صريحه وواضحه وفي سطرين
يا أمي وأختي وحليلتي
وبنتي اللي يارب تكون
سبب للجنة يوم الدين
بحبك لما بتكوني
عفيفة ، رقيقة ، مستورة
مطيعة ، زكية ، وصبورة
شقية ، مشاغبة بس بلين
عشان تحلي الحياة بينا
ودايما نبقي متفاهمين
واحطك تاج علي راسي
واشيلك جوه نن العين .
***
من كتاب (بريد الشوق)
علي درويش