جنان بصور _ ريم تاج
جنان بصور
حديقة منورة زهر وريحان ..
بير الناعورة والساريج
قبالة التوتة وخيمة الكرمة
مدلية بعناقد العنب
وعلى بنة الكرموس
غير قشر وكول يا الزاير لا تسال ،
وديك الرمانة حتى هي
مكنزة بين لقصب وشجر اللوز
والزيتون وسطهم نخلة
باسقة بعراجن التمر ،
يا حسراه يا ليام
كي كانت فرحة الصغر
مع لقران ،
لعبة الشريطة ولعرايس
والديور وطحريجة
مرجحة بين لغصان ،
النوبة عليها بالفرحات
والضحكة الرنانة ،
طايرين بيها فلعلالي
يا سلام ،
صينية مقيومة ببراد أتاي
مشحر بالشيبة والنعناع ،
والقعدة مروقة مع لحباب
وسط الزهر والنواور
مشكلة لوان ياسلام ،
شكون قال ترجع ديك ليام
من الماضي تولي كيف
لخرافة تتعاود يا حسراه ،
فين مجمع لحباب
والجورة ولصحاب ،
الله يرحم ديك لوجوه
لحنينة لي غابت ،
سبقت لدار الحق ،
ما بقات غير ذكريات غالية
نتفكروها تغرغر العين
وطيح الدمعة سخونة
على لخداد ،
إيييه على ديك ليام
شحال كانت زوينة
مشات مع ماليها
يا حسراه !
ريم تاج / العيون سيدي ملوك
الشاعرة ريم تاج
اضف تعليقاً عبر:
الابتسامات