يا قلبك / شريف شحاته /مجلة الشعر العربي

 زجل

يا قلبك

بقلم شريف شحاته

مصر 18 مايو 2024

ما قدرتش ولا مرة تفوت علي بيتنا تعدي وتسلم

من غير ولا كلمة أو صوت يا فايتني في بعدك أتألم

مش فاكر غنوة كانت بيننا مش فاكر حتي ولو كلمة

ولا همسة جميلة بتسعدنا أو فرحة كانت في اللمة

كان نفسي أتعلم منك شوية من الجفا والقسوة

يا كاويني بناري مع إنك ما رحمتش قلبي ولو سهوة

معلشي يا سيدي أهي غلطة ومسيري أجرب وأتعلم

ما قدرتش ولا مرة تفوت علي بيتنا تعدي وتسلم

من غير ولا كلمة أو صوت يا فايتني في بعدك أتألم

يا ما قلبك عيشني هوان وأنا قلبي بيغفر ويسامح

يا ما شفت في قربك حرمان وأنا أجي علي نفسي

وأصالح

كل دة بيمر وبتشيل غلطة بسيطة كانت مني

وأنا عمري ما حط ولا أشيل حتي ولو قسوة بتألمني

ولو هفوة كانت غصب عني تفضل تعاتبني وتتكلم

ما قدرتش ولا مرة تفوت علي بيتنا تعدي وتسلم

من غير ولا كلمة أو صوت يا فايتني في بعدك أتألم

لو بعدي كان حلو علشانك خليني في بالك بكلام

مش عايز حبك وحنانك عبرني ولو حتي سلام

مش تمشي ولا تسأل فيا وكأن ما بيننا دة سراب

وتعدي ولا تطل عليا يا فايتني في حيرة وفي عذاب

وأفتكرك والذكري تاخدني والشوق يكويني وما بيرحم

ما قدرتش ولا مرة تفوت علي بيتنا تعدي وتسلم

من غير ولا كلمة أو صوت يا فايتني في بعدك أتألم

شريف شحاته