زجل
موال
بقلم شريف شحاته
8 يونيو 2024
يا صاحبي إياك تآمن لخسيس وعبد المال
في لحظة ينسي العشرة لو حس ضيق الحال
ويروح يشوف غيرك لو شاف أموره ماشية
بيهجر وينسي خيرك ويدور مع الحاشية
وايه تعمل الأموال في وضيع يحب السؤال
يا صاحبي ليه تنسي صاحب بقلبه يعزك
واقف بضهره معاك ساند عليه عجزك
وتحب صحبة خسيس طبال ورا السلطان
لو داس عليه بالقدم بيقوله مش غلطان
تلاقي أيده في ايدك لو كنت في السلطة
وعلي طول يشيل أيده لو شاف عليك غلطة
لا عمره حيكون سند ويفر لو شاف ورطة
يا صاحبي رافق أصيل وحافظ عليه بروحك
بيبكي وانت عليل وسامح رفيق روحك
ولا تجعل شيطان ملعون يفسد كدة بينكم
وعشرة تضيع وتهون وتغور محبتكم
علي رأي ناس عواجيز قالولنا في الأمثال
الأصل في التبريز لو حتي لونه مال
عاشر فقير وأصيل وإقفل عليه قلبك
لو شاف حالك بيميل يفضل واقف جنبك
سيبك من الناس دول ياما رفعوا جبان
بيحبوا لون الفواقع والأحمر البهتان
ويكرهوا سواد اللون وهو سيد الألوان
والخسيس لو لبس تاج عليه الماس
يفضل خسيس ينحني وبالقدم ينداس
وابن الأصول لو عجز صفه مع الفرسان
ورغم ضيق الظروف فصيح بألف لسان
لا فيه نسور تنحني ولا تنعق مع الغربان
والبغل لو رفعوه عمره ما يبقي حصان
وعجبي. شريف شحاته